Минзәләдә мәктәп укучылары өчен «Әбиемнең ак яулыгы» дигән чара узды. Оештыручылар татар яулыгы тарихы турында сөйләделәр, кызлар өчен яулык бәйләү серләре буенча дәрес уздырдылар.
Укучыларга, татар хатын-кызлары яулыкны татар милли гореф-гадәтләргә туры китереп бөркәнә, дип аңлаттылар. Ике янәшә почмагын ияк астына бәйләп, яулыкның үзен таратып аркага төшерәсең. Бу — элеккеге гадәт буенча, баш, муен, ияк, арка һәм иңбашларын каплап торсын өчен шулай эшләнә. Кызлар исә, хатыннардан үзгә итеп, яулыкның ике очын колак артыннан уздырып, артка чөеп бәйли, бит, муен, иңбашларын капламыйлар.
«Яулыкларда тарих чагыла. Нинди генә чорны карама, нинди генә халыкның сәнгать үрнәкләрен күзәтмә, һәрберсендә милли бизәкләр. Ефәк җепләр белән чигелгән ак яулык, татар яулыгы — сафлык билгесе», — дип сөйләделәр алып баручылар.
